妹妹長大了

妹妹的金口開始開了。妹妹現在會講，拜拜，得，食，爸比，無，貓貓，wow wow，奶奶，比，麻尾，爺爺，波波~

早幾天訓覺時妹妹訓在我肩膀上，我叫她"殊"。她就把食指放在嘴唇上并發出"殊"的聲音，然後麻尾就忍唔住笑到震。。。 妹妹又跟住笑到震！！ 笑完一陣又"殊"過，妹妹這次唔等麻尾笑，就自己笑出聲先。這樣重復玩了好幾次。

沒有東西比這些時刻更珍貴！

想你開心點

晚上大家在床上玩。。。

爸比： 哥哥你聼日想邊個帶你返學？
Gee： （指住爸比）
爸比： （沾沾自喜又好奸的樣子） 爸比同麻尾湊你返學有咩唔同呀？
Gee： （想了一下） 無唔同呀！

爸比死心不息。。。

爸比： 咁點解你選爸比同你返學既？
Gee： （不加思索） 因爲想你開心d 咯！

Waakakaka~~

高手

晚上大家在床上玩。。。

麻尾： 哥哥，你覺得何以心靚d，定係陶希藍靚d？
Gee： （不加思索） 我覺得麻尾靚d！

Waakaka~~ 真係冧女高手！

多謝

中午在婆婆家等吃中午飯，Gee 突然走過來。。。

Gee： 麻尾，我可唔可以同公公講多謝呀？
麻尾： 可以。 （雖然唔知無啦啦點解要講多謝，但講多謝當然可以啦~）

Gee： （走到公公面前） 多謝公公！
公公： 點解多謝我既？
Gee： 多謝你煮野比我食。

嘩！！ 麻尾聽到都好心甜。Gee 留意到其他人為照顧他的付出。      

麻尾肚腩

近來麻尾每次在嫲嫲那裏餵完妹妹，準備穿衣服的時候，妹妹都會走過來攬住麻尾的肚腩。

好喜歡個肚腩的樣子，可能她記得之前在裏面住過。 ^o^

妹妹生日蛋糕

麻尾： 妹妹就快生日，你幫妹妹手選個蛋糕呀！
Gee： 好呀！選完蛋糕之後呢，麻尾就係上面加d 奶奶！因爲妹妹鍾意飲奶奶。

返工

昨晚幫 Gee 沖涼的時候問。。。

麻尾： 麻尾以後唔返工每日陪你好唔好？
Gee： 陪我做咩呀？
麻尾： 每日接你返學放學咯。
Gee： 好呀！

麻尾開心了幾秒。。。

Gee： 麻尾，你都係返工啦。
麻尾： 點解呀？
Gee： 因爲我想你返工賺 money 買野食。
麻尾： 噢。
Gee： 因爲你要食好多野，所以要返工賺 money。
麻尾： 知道。。

其實Gee 同麻尾一樣gum 大食。。。 -_________-"

調位

Gee 中午飲茶時不專心吃飯，麻尾不高興地瞪了Gee 一下。。。

麻尾： （不高興的樣子） 你好快d 食啦，如果唔係麻尾嬲架啦！

Gee 不作聲。 幾秒后。。。

Gee： 麻尾，你可唔可以調位呀？
麻尾： 點解呀？
Gee： 因爲我唔想見到你個醜樣呀。

-____-" 之前麻尾講過如果麻尾嬲既時候樣子會變得好醜怪，所以叫Gee 唔好激到麻尾嬲，因爲麻尾唔想變醜樣。

善良的哥哥

晚餐后，婆婆切好了一小塊一小塊的蘋果比麻尾和Gee一起吃。 吃到最後兩塊，其中一塊已經開始氧化，顔色比較黃。

Gee： （指著已經氧化那塊蘋果） 麻尾，我食黃色個塊，你食白色個塊。因爲我驚你吃左黃色個塊會肚疼呀。

很細心的哥哥。

我們在婆婆家借了個旅行的箱子準備下星期爸比和Gee 去新加坡旅行用。Gee一路上幫麻尾推箱子，推到大廈街口時。。。

Gee： 麻尾，我今日唔跑啦。（平時Gee 一去到街口就會拔足狂奔） 因爲我怕你唔夠力推個喼。

Gee這些窩心的小舉動可見Gee 是個溫柔且善良的好哥哥。

我唔飽呀

Gee 剛剛吃完飯。。。

Gee: 麻尾，我唔飽呀！
麻尾： 你arm arm 食完飯wor。 gum 返屋企食水果啦。
Gee： 我食完水果都唔飽架。 要食一粒糖先飽。

-_______-"

麻尾，你煮d野好好味呀！

星期六下午Gee 本應該要睡覺，但搞了很久都未訓著。 麻尾有點生氣問其實Gee是否肚餓，如果係，可以吃煮給妹妹的通心粉。 Gee表示同意。 麻尾幫Gee 弄好食物后回房間休息。 聽到Gee在桌子上玩。。。

麻尾： （生氣的語氣） 你係唔係食架？！
Gee： 係呀！ （幾秒后。。。） hm！ 真係好味呀！

麻尾原本的生氣完全沒有了。

Gee： （繼續誇張大聲地。。。 每吃一口就講。。。） hm~ d 通心粉真係好味呀！ hm~ d 蘿蔔真係好味呀！ hm~ d 節瓜真係好味呀！ （還未講完。。。） hm~~ 麻尾，你煮d野好好味！！ （見麻尾沒有回應，直接走進房間再講） 麻尾，你煮d野真係好好味呀！ 攬住好唔好？

麻尾由本來的生氣在兩分鐘内變成甜笑。

10個半月的妹妹

妹妹現在聼得懂奶奶，媽媽，爸爸，哥哥，蘋果，星星餅，波波，monkey，bom bom 被，咬咬咬，舉手，好野（然後拍手）。

妹妹可以自己站立十幾秒，經常站立后自己放開雙手。 妹妹非常喜歡哥哥，每次見到哥哥都會使勁的爬/轆過去。

現在下門牙有兩隻，心形舌有改善。會咿咿呀呀地自己説話。也會爬行和扶著家具到處走。

晚上還是起身兩，三次，已經訓左爸比個位。吃固體好多了，但還是拒絕用樽飲奶。

不經不覺原來妹妹已經就快一歲，麻尾要努力享受現在的一切一切。

祈禱

在散學禮派對上，有個祈禱環節。由其中一位同學的媽媽帶領禱告，一開始的時候所有同學都自動合起雙眼，雙手合十。 但幾秒后，Gee開始不耐煩，並想飲面前的紙包飲品。 可是禱告又未完成，只好繼續閉起雙眼，張口去飲。 由於看不到飲管的位置，Gee一邊合埋眼睛，一邊嘟起嘴仔尋找飲管，畫面有趣！

甜心哥哥

麻尾昨晚和Gee 一起刷牙。。。

麻尾： （一邊撥弄頭髮。。。） 唉。。。 麻尾有好多白頭髮呀。 嗚嗚嗚~ （扁嘴及彎腰比Gee看白髮）
Gee： （突然放下牙刷，很溫柔地講。。。） 攬住好唔好呀？
麻尾： 好！！
Gee： （攬完之後，Gee 馬上再看麻尾頭上的白髮，有點失望。。。） 重係到wor。。。
麻尾： 麻尾已經好開心啦~~~~~~ （麻尾已經甜到唔介意d白頭髮）

奶~ 奶~

妹妹第一個有意識的詞語竟然是。。。 奶~ 奶~

妹妹半夜醒左麻尾唔理她，她等左一陣就。。。

妹妹： 奶奶奶奶~

每晚臨訓，如果爸比麻尾同哥哥玩得太耐，而妹妹又想訓覺，她也會叫奶奶~~~ ^o^

解決問題

晚上在婆婆家就快吃完晚飯，突然收到爸比的 Whatsapp 要幫Gee 買奶粉。 但麻尾沒有帶銀包。。。

麻尾： 我地一陣先返屋企拿銀包，然後再落返去萬寧買奶奶。
Gee： 咩話？
麻尾： 麻尾無帶銀包，所以要返屋企拿。
Gee： （眼碌碌） 問婆婆拿錢未得咯！
麻尾： （麻尾之前完全沒有想到） 係wor！咁你都諗到！！

Gee 真係好叻解決問題！

靚女

傍晚出去吃飯，在樓下等的士。 爸比背著妹妹，麻尾拖住Gee。 迎面有一對年輕情侶走過，他們走近的時候，女的突然大驚。。。

女： （抓住男朋友把他拉停並指住妹妹） 嘩！好靚女呀！！

麻尾見到爸比沾沾且得戚的樣子！！！

回到家。。。

爸比： （繼續沾沾自喜） 好威呀！我都未試過拖靚女出街！
麻尾： -______-""

窩心的Gee

晚上在公公婆婆家吃完飯，已走出走廊準備回家。。。 麻尾準備關門的時候，Gee 急忙奔跑回來。。。

Gee： （大叫） 唔好關門住呀！！
麻尾： 咩事？
Gee： （一邊急衝回公公家，一邊回答。。。） 我唔記得錫公公呀！

一轉眼Gee 已經攬住公公。 錫完左邊面，錫右邊面！錫完就一支箭咁跑返出去等電梯。

麻尾在旁看到都覺得好心甜，公公更是甜到入心窩！！

對話

爸比帶Gee 去跑馬地室内兒童遊樂場玩。 Gee 和其中一個小朋友的對話。。。

小朋友： Hello， BB！
Gee： 我唔係BB，我係哥哥。
小朋友： 我5嵗架啦！
Gee： （理直氣壯，充滿信心） 我3嵗架啦！
小朋友： 。。。 。。。

唔係你講

唔係你講
晚上在婆婆家Gee 有點頑皮，麻尾也有點太累。麻尾用力拉Gee 出去洗手。。。
Gee： （好正經地） 麻尾，你整到我d骨頭呀。
麻尾沒有反應。
Gee： （好正經地） 麻尾，你整到我d骨頭呀。
婆婆這時候進來。。。
婆婆： 你疼唔疼呀？
Gee： 疼呀！
婆婆： 好啦！麻尾下次小心d唔會整到朗言架啦！
Gee： （樣子非常嚴肅！沒有一絲笑意。眼神好堅定地望住麻尾） 唔係你講，係麻尾講！
他的用字，語氣，表情都和麻尾之前要求Gee 做錯事要自己道歉，而不是婆婆代爲道歉一樣！！！本來應該馬上配合講話下次唔會，但麻尾被Gee 的回答搞到哭笑不得！！最後。。。
麻尾： 對唔住！麻尾大力左整到你！
Gee： 嗯。
麻尾： 你應該講咩呀？
Gee： 講咩呀？
麻尾： "下次唔好啦！"
Gee： （馬上偷笑。。。）下次唔好啦！

多謝你經常提醒麻尾要注意自己的言行舉止，因爲你一直在身邊看著，學著，監督著。

9個月的妹妹

上星期你剛剛學會扶住床邊由坐著的姿勢拉起到站著。 站著后你會自豪的咧嘴而笑，並會大膽地舉起一隻手，平衡后就換另外一隻手舉起。 顯然你對自己能夠站立表示非常高興。 今天早上麻尾在刷牙，你站立后竟然兩隻手都放開，自己站立了幾秒！！！ 坐下后你好似知道自己做了一件了不起的事，笑得好開心！！
這幾天你晚上睡得很好，每晚好像只是起了一次。 但這幾晚你都是睡在大床，在麻尾身邊。可憐的爸比就被迫在廳的沙發睡覺。 你要繼續努力，晚上就算醒了都要慢慢自己學習再入睡，麻尾會在旁邊！加油！！
你開始聽得明白我們説話。人家叫"妹妹"或"倩怡"你都會轉過頭來。而"星星餅"更是講一次就記得，並每次都眼睛睛的盯著餅罐。最好玩的是你懂得"攬住"。麻尾一講攬住，並張開雙臂你就會整個人趴在麻尾身上！好令人心甜！^-^
你是那麽的喜歡哥哥，每次見到他你都會目不轉睛的看著他。一有機會在他身旁就會伸手摸他，抓他，表示想和他玩的意思。那天麻尾把你們倆一起放到浴盆裏，哥哥用玩具幫你洗頭，雖然你整面都是水，但你笑得好甜美。好像是說終于可以同哥哥一起沖涼啦！麻尾知道你們會繼續相親相愛，互相照顧！

下次唔好啦

晚上爸比替媽媽和妹妹拍影片，拍完后爸比把電話掉給麻尾。 Gee 馬上力斥！
Gee： 你唔可以掉電話架！咁樣唔arm 架！
爸比： 噢！知道。 麻尾對唔住。
麻尾沒有反應。。。
Gee： 麻尾， 爸比同你講對唔住呀！
麻尾： （一時間想不到怎樣回應。。。就隨便講） 唔洗客氣！
Gee： （沒有好氣地講。。。） 唔係講唔洗客氣呀。。。
麻尾： 噢！ 咁應該點講呀？
Gee： （想了一想，好正經地。。。） 應該話下次唔好啦！！

愛媽媽，愛爸爸

晚上大家在床上玩的時候，Gee 突然走過來靜靜地在麻尾耳邊說悄悄話。。。
Gee： （好細聲講。。。）愛媽媽，愛爸爸
看到麻尾開心的笑容，Gee 也笑得好滿足！麻尾也和Gee 說悄悄話。。。
麻尾： 麻尾愛朗言！
然後大家都笑到扭作一團！幾句説話比起什麽甜品都要甜，比起任何娛樂更快樂。

攬住

現在每天早上Gee 上學前都會來麻尾來一個好肉緊的"攬字"！！ 昨天晚上和Gee 誇張地攬住幾次，妹妹好似好想參與！
今天早上飲奶后，麻尾就在妹妹面前大叫"攬字"，妹妹竟然會張開雙手並整個人訓係麻尾心口上！好似真係識聼！ ^-^

可愛的哥哥

晚上Gee 回家后不太願意沖涼。。。
麻尾： 你要唔要麻尾同你沖涼呀？如果你重唔沖我就餵妹妹架啦！ （語氣有點兒生氣）
本來以爲這樣可以令Gee 馬上選擇去沖涼，點知。。。
Gee： （不慌不忙地。。。） 你去餵妹妹啦！佢成日無飲奶奶，佢好慘呀！ （妹妹今日在嫲嫲家沒有飲奶奶。。。V_v）
連爸比都驚嘆Gee 會這樣回答！Gee 是真的好關心妹妹。 ^__^

地盤

和Gee 搭巴士，Gee 突然指住車尾的逃生門大叫。。。

Gee： （嚴厲地。。。） 拿！個到小朋友係唔去得架下！
Gee： （周邊的乘客都不出聲， Gee繼續。。。） 個到就叫做。。。
Gee： （慢慢地一個一個字講。。。） 地！！
Gee： 盤！！

原來他不是指住逃生門，是指住外面的地盤！！

附近的乘客都在微笑！ ^-^

搭小巴

爸比每天都非常享受帶Gee 返學。 早上在小巴。。。

Gee： （大聲地~~） 巴士站有落呀，唔該！
Gee： 爸比，如果司機聼唔到呢？
爸比： 咁就再叫多次咯。
Gee： 如果再叫多次都聼唔到呢?

爸比： 咁就爸比叫咯。
Gee： 如果爸比叫都聼唔到呢?
爸比： 咁爸比就再叫多次咯。
Gee： 如果爸比再叫多次都聼唔到呢?

爸比： 咁就爸比同朗言一齊叫咯。
Gee： 如果爸比同朗言一齊叫都聼唔到呢?
爸比： 咁爸比同朗言就一齊再叫多次咯。
Gee： 如果爸比同朗言一齊再叫多次都聼唔到呢?

爸比： 咁就按鐘啦。
Gee： 如果按鐘都聼唔到呢?

。。。 。。。

Lonely

爸比近來教Gee 英文。。。

爸比： 你今晚自己訓啦！
Gee： （細細聲講） 咁我未好lonely?!

爸比之前有教過Gee lonely 這個英文。 聽到后好驚訝他會運用,就乖乖咁陪Gee 訓，等他唔好lonely。

整甜品

昨晚 Gee 訓到半夜突然坐左起身並大叫。。。

Gee： 我要同麻尾訓！！！

麻尾訓低左之後。。。

Gee： 我想依家同麻尾整甜品呀。
麻尾： 好！我地諗下正咩甜品，然後放假去買材料好唔好？
Gee： 好！

麻尾一廂情願覺得我們整甜品（曲奇餅，Jelly）的過程令到Gee 覺得開心和溫馨~ ：）

關心別人的Gee

麻尾在鈎披肩比太婆，Gee在床上食手指。。。

Gee：（突然很溫柔地說） 麻尾，你不如織返一條比自己呀！

雖然是好平淡的一句話，但麻尾覺得超級窩心！Gee看到麻尾鈎披肩，香包，帽子比其他人，但沒有鈎過東西比自己。Gee真係好愛惜麻尾！

***************************************************************

早上吃早餐，Gee在吃吞拿魚包。。。

Gee： （meet 一塊包比麻尾。。。） 麻尾你食呀！
麻尾： 唔食啦！
Gee： （好堅持） 食啦！好好食架！好食個d先比你食， 唔好食個d我自己食！

嘩！！！ Gee 真的好好心地！！

小甜心

公公要去醫院拿葯。。。

Gee： 公公，我陪你去醫院拿葯呀！
公公： 唔洗啦。我自己去得啦。
Gee： 我陪你去，我要保護你呀！
公公冧曬！！ ^-^

*********************************************************************************

婆婆要去牙醫那裏拔牙齒。。。

Gee： 婆婆，我陪你去拔牙齒。
婆婆： 咁我入去拔牙個陣，你點算呀？
Gee： 我係門口等你咯！
婆婆又冧曬！！ ^-^

BB 糖

Gee和婆婆在惠康買左可以吹BB的BB糖。 Gee在麻尾未去婆婆家吃飯前已經吃左兩粒。 晚飯時。。。

Gee： （已經吃完飯，自己走過來） 麻尾，d BB 糖好好食架！我示範比你睇呀！
麻尾： 唔洗啦！
Gee： 唔好啦，我示範比你睇
麻尾： 唔洗啦！我知道可以吹出聲架啦。

事敗后自己走開左。。。 ^o^

甜品

琴日我們在17樓吃野，Gee吃得津津有味。。。

Gee： 嘩！呢到d野好好味呀！不如我地叫埋。。。。。

停左幾秒。。。。爸比麻尾在估Gee會叫埋邊個一齊黎食呢。。。

Gee： 不如叫埋甜品呀！~

哈哈哈哈哈哈~ 笑死爸比麻尾！

講數

在公公婆婆家晚飯。。。

Gee： 婆婆，我想食糖。
婆婆： 唔得呀！你今日曳。
Gee： （想了幾秒，並好認真地講） 好！如果乖就食兩粒，曳就食一粒！

**********************************************************************************

晚上和爸比玩。。。

Gee： 爸比，如果贏左就食糖呀！
爸比： 如果輸左呢？
Gee： （冷靜地說） 就食輸糖咯！

-_-"

母親節禮物

星期六和公公婆婆飲茶，婆婆在玩手機。。。

Gee： 婆婆，我有利事錢，我買個手機送比你呀！
婆婆： （好高興） 好呀！10月就有新手機出啦！
Gee： （想了幾秒） 我母親節買手機送俾你呀！
婆婆: （笑到見牙不見眼） 多謝你呀！！

應該好耐都沒有人這樣tum過婆婆了。 :) Gee真係好得人中意！

妹妹聽話

妹妹現在眼訓會扭計。 咿呀！咿呀！ 然後打橫抱又唔得， 打直抱又唔得！

今天中午麻尾餵完奶后 tum 妹妹， 妹妹扭計。 麻尾話妹妹，話發脾氣系訓唔到覺的！她好似明白gum樣馬上收聲，眼look look gum 望住麻尾，然後好乖gum 比麻尾打橫抱住。跟住慢慢合埋眼訓。

妹妹， 麻尾知道你現在好努力在學習吃粥仔，爬行，講話，自己訓覺。 麻尾會同你一齊並幫助你架！妹妹加油！！ 麻尾更加要加油！！

心甜

今天在Esprit 睇衫，Gee拖住麻尾⋯⋯

Gee：麻尾，你may埋眼我拖你去睇d好靚既野呀！
麻尾may埋眼，Gee拖住麻尾行前兩步，係條裙子前面停低。
Gee：你可以打開眼啦！
當麻尾以為Gee想帶麻尾看裙子⋯
Gee：你踎低睇下。
原來在裙子後面的玻璃可以看到下一層的東西。
Gee：（很滿意地）嗱！係唔係好靚呀！

麻尾多謝Gee願意和我分享美好的事物。麻尾好心甜呀！這個小小的舉動足夠令麻尾開心好耐。：）

愛妹妹

早上出去吃早餐，經過一家賣衣服的店舖。裡面有小朋友衣服賣。

Gee：麻尾，你可以黎依到買衫比妹妹呀。
麻尾：你真系好錫妹妹！^_^

糖

Gee近來很喜歡吃糖⋯

在婆婆家。
Gee：婆婆，我想食糖呀。
婆婆：唔得，你今日曳。
Gee：（很認真地說）乖就食兩粒，曳就食一粒，好唔好？

................................................................

和爸比玩⋯
Gee：如果贏就食一粒糖，好唔好？
爸比：如果輸左呢？
Gee：就食輸糖。
爸比：~_~

錫

晚上在家吃飯，Gee自己吃。

Gee：婆婆餵我架。
爸比：婆婆錫你呀嗎！
Gee：（很自然地講）爸比都好錫我架，你餵我呀。
爸比：~_~

照顧麻尾的哥哥

妹妹晚上睡得不好，麻尾也沒有怎麽睡。 早上，爸比出去買早餐，麻尾去廚房喝水。。。

Gee： （走過來，眼look look 咁望住麻尾） 麻尾，點解你個樣好似唔開心咁既？
麻尾： 係呀！我好眼訓！唔開心呀！
Gee： 但係我好開心wor！
麻尾： 咁你攬住我比d 開心我啦~
Gee： （好大方地張開雙臂~） 攬字！

麻尾癱瘓在床上，妹妹在旁玩耍。爸比買完早餐剛進門口。。。

Gee： （馬上叫） 爸比，你睇住妹妹，等麻尾去食野呀！
麻尾： （哇！！！ 麻尾好感動好感動好感動呀！！！！）

香蕉

星期五晚上在婆婆家和Gee 提過一陣想去惠康買香蕉星期六比妹妹吃。 但吃完飯麻尾太累就想儘快回家， 經過惠康也沒有下去。 快到家樓下時。。。

Gee： （突然。。。） 我地去買香蕉呀。
麻尾： 聼日先買啦。麻尾好累。
Gee： 唔好啦！咁妹妹未無得食咯！
麻尾： （Gee實在太關心妹妹了，幾累都要去） 好啦！你咁鍚妹妹！

買左3隻香蕉，快到大堂時麻尾建議比一隻看更姨姨，一隻比看更叔叔，留返一隻比妹妹。 Gee 很慷概話好！入到大堂，姨姨在講電話，好似在講公事。 Gee 靜靜地走到姨姨面前送上香蕉， 然後聽到姨姨大叫~

姨姨： B！！ 你送比姨姨架，多謝你呀！B！係唔係送俾姨姨架~？

比姨姨成梭蕉拿走左。。。 有些不知所措，因爲有一隻係比妹妹的。 但又唔知點講。。。

Gee： （有點不好意思地望住我。。。） 係唔係比姨姨架？
麻尾： 係呀！

然後我們在姨姨浮誇的多謝聲中入電梯。

麻尾： 唔緊要啦~ 我地聼日再買過比妹妹。
Gee： （微笑） 好呀！

Gee 真是大方又好心地！

口甜舌滑

早上麻尾搽完新的護膚品就幫Gee 小便。 麻尾的臉貼在Gee 的耳朵后。。。

Gee： hm！好臭呀！
麻尾： （大驚！d 新的護膚品好臭嗎？！） 邊個臭呀？
Gee： （淡定地。。。） 你好香，個廁所好臭！

在旁的爸比高度讚揚Gee 可以在一句説話扭轉整個氣氛~！麻尾就被tum得好開心！人仔細細就口甜舌滑~~

Toby

爸比有一晚睡在Gee床邊的地下。

爸比第二天話， 訓到半夜覺得有人成隻Toby 掉落他面上！！ 並不是不小心的掉下來， 是被人大力地扔下來。 爸比後來想， 可能是自己的鼻鼾聲太大， Gee 認不住掉隻Toby整醒爸比。

再之前的半夜麻尾都有聽過Gee 大叫。。。

Gee： （爸比的鼻鼾正濃。。。） 爸比， 你細聲d 啦！！ ^o^

鉛筆

今天早上Gee 突然話要帶一支鉛筆返學校。 之前老師試過叫小朋友帶廁紙筒， 只是口講， 沒有寫在手冊， 看小朋友會不會傳達老師的信息。

走回學校的路上。。。

麻尾： 帶支鉛筆返去做mud 野呀？
Gee： 學校的鉛筆唔靚。
麻尾： 邊個支鉛筆靚d 呀？
Gee： 我個支咯！其他同學都帶自己支鉛筆架！

不知道是不是真的是老師叫帶鉛筆， 還是Gee 想用私家筆呢。

GeeGee 講故事

晚上提早回家和Gee沖涼，做功課，講故事。 爸比之前提過Gee 現在會自己講故事。。。

麻尾： （講完第一本故事書后。。。） 不如你講呢本比麻尾聼呀？
Gee： （有點害羞） 我唔識講架wor。
麻尾： 試下啦！又或者講消防員去第二間屋救火故事。
Gee： （想了想） 你講完呢本之後到我講好無？
麻尾： 好呀！！

*Gee 講消防員故事*
一開始講的時候細細聲，有點害羞，講講下又會偷望下麻尾的反應。

Gee： d 消防員呢， 就係消防局， 突然間呢， 警鐘就響啦。 跟住呢就出動啦。 去到救火個到有好多煙， 然後就噴水。 跟住呢就救熄左。 講完！ （笑）
麻尾： （真心覺得！！） 講得好好聽呀！！

*Gee 講警察故事*
麻尾再講一個故事后， 又到Gee 講。

Gee： d 警察呢就係到食飯wor， 跟住呢個冷鈡就響啦！ 然後出去拉壞人。 拉左個壞人就用手銬銬住佢。 跟住就去左坐監。 d 警察呢就返返去食飯啦。 講完！

希望下次可以錄低Gee講故事的樣子！^0^

搭嘴

晚上麻尾和公公討論時事， Gee 自己在旁邊玩貼紙。。。

麻尾： 。。。我都算老架啦。。。
Gee： （突然搭嘴） 麻尾你唔算老呀！
麻尾： （心心眼） 多謝你呀！
婆婆： 咁公公算唔算老呀？
Gee： 唔算！
婆婆： 咁婆婆呢？
Gee： 算呀！

胎內記憶？！

麻尾：你係邊度搵到麻尾架？
Gee： 公園咯。
麻尾： 咩公園呀？
Gee： 維多利亞公園。
麻尾：你點入麻尾個肚架？
Gee：dok 你個肚臍，就入左去。跟住再dok一下肚臍關門。
麻尾：係麻尾個肚到係濕還是乾架？
Gee：係濕架。
麻尾：你係麻尾個肚裡面做咩呀？
Gee：食野咯！
麻尾：係麻尾肚裡面還有沒有其他人架？
Gee：無呀。
麻尾：係麻尾個肚裡面見到有咩色？
Gee：黃色，紅色，黑色。

這是麻尾第一次問Gee這樣的問題。不知道是麻尾心理作用還是真的，Gee講這話題的時候，樣子特別溫柔。好像在分享一些只有我們倆知道的事情。

麻尾今晚心裡覺得好溫暖，好窩心。:)

妹妹愛麻尾

雖然麻尾有時頭髮蓬鬆，滿臉油光，衣衫不整，但每當妹妹見到麻尾的時候都會露出燦爛的笑容！！有時吃奶吃到一半又會離口望住麻尾微笑，然後再吃！！其他人抱住妹妹時大喊，麻尾一抱就收聲！！

麻尾覺得自己好重要呀！！^o^

照顧妹妹

雖然平時大部分時間Gee 都不是對妹妹有太大興趣，但從小事可以看得出他還是關心妹妹的。

假期我們在大枱吃下午茶，Gee 大個可以和我們一起吃。 妹妹就坐在 high chair。

妹妹坐了一會兒不耐煩，開始大叫。 我們只是安撫妹妹叫她不要嘈。

反而Gee 就走過去把妹妹的 high chair 拉過來。 話妹妹喜歡接近我們。 果然，妹妹沒有大叫了。 ^-^

***********************************************************************

假期的下午，Gee 睡醒午覺，妹妹還在睡。 樓上傳來電鑽聲音。。。

Gee： 你可唔可以叫佢細聲d呀？我怕佢嘈到妹妹呀！

^__^

幻想力

Gee 在玩Thomas 的拼圖。 有一張大的彩色圖片上面有整個拼圖完整的樣子。 Gee 自己一邊玩一邊自言自語。。。

Gee： 當我地出曬街既時候呢，d 火車會自己走出來架~
Gee： 然後呢，就會得返一張白紙架啦！

----------------------------------------------------------------------

晚上沖涼后麻尾幫Gee 吹頭。。。

Gee： （吹到一半） d 濕去做邊度呀？

爸比麻尾都有點驚訝會這樣問。

數數

新年的時候和公公婆婆，爺爺嫲嫲在酒樓晚飯。 嫲嫲叫Gee 數人數。。。

Gee： （逐個逐個數。。。） 1，2，3，4，5，6，7 （加埋自己！）

大家正想拍手讚揚，嫲嫲突然話。。。

嫲嫲： 唔係7個，重有呢個呢？（指住在bb車上的妹妹） 再數過啦~

大家以爲 Gee 會由頭開始數過，點知。。。

Gee： （不慌不忙地望住在bb車上的妹妹。。。） 8

大家都被Gee逗得很開心！！

擺鋪士

早上和Gee上學坐的士經過利東街。。。

麻尾： 琴日你係唔係同婆婆黎呢到影相？
Gee： 係呀！佢叫我擺鋪士，鋪士。都唔知鋪乜野士。。。 （Gee的表情和語氣有點無奈,但好好笑）

到學校門口后。。。

的士司機： 你快d 返學入去擺鋪士啦~~

司機叔叔應該覺得我們的對話好好笑~

麻尾生日

今日一早麻尾起床走出廳后，Gee 第一句就同麻尾講生日快樂~~ 麻尾開心到獎Gee 飲朱古力奶！！

然後當麻尾刷牙，Gee痾屎時。。。

Gee： 我今日唔返學同麻尾慶祝生日快樂啦，好唔好呀？
麻尾： （咁都比你諗到！） "___"

生日禮物

天氣冷，婆婆提早帶Gee 回家。 麻尾回家后。。。

Gee： （Gee 拿住一個金莎朱古力） 麻尾你食唔食金莎呀？
麻尾： 食呀！
婆婆： 今日有人送左一盒金莎比公公， 公公問朗言一起食好唔好， 朗言話唔好啦， 留返黎送俾麻尾做生日禮物！

好感動！！ 盒金莎沒有開過， 整盒準備送俾麻尾！！好冧呀！！

邏輯

爸比： 你識唔識望班d老師架？
Gee： 識呀！有朱老師啦~ 佢屋企有好多豬豬架！
爸比： 葉老師屋企係唔係有好多葉呀？
Gee： 係呀！
麻尾： 咁李主任屋企呢？
Gee： 有好多梨咯！
麻尾： 咁賴冠華屋企呢？
Gee： （有一點點偷笑。。。） 有好多賴咯！
麻尾： （竟然識得咁玩。。。） 咁吳朗言屋企呢？
Gee： （笑。。。） 有好多吳咯！！ 呵呵呵呵~~

成個都好乖

晚上在床上玩。。。

麻尾： 點解d人咁錫你既？
Gee： 因爲我乖囉！
麻尾： 你邊到乖呀？（指住面，再指住大髀） 依到？依到？
Gee： （一邊食nini，一邊淡定地講。。。） 我成個都乖！

唔係咁樣架wor

下午大家都睡醒了。。。

Gee： 麻尾，我想痾屎。
麻尾： （還未睡醒，馬上幫 Gee 除褲並將 Gee 放到大廁所上面）
Gee： （坐上大廁所后面有難色。。。） 唔係咁樣架wor。。。
麻尾： （點樣唔係呀。。。定神后發現原來麻尾唔記得放Gee 的屎屎盆上去，所以Gee個細pat pat 就快成個跌左落去。。。）

^0^

有沒有洗手間

周末爸比答應帶Gee 去試玩平衡車，店子在觀塘，我們一家四口搭地鐵去。

轉車到將軍澳站的時候，Gee 突然問。。。

Gee： 呢到有無廁所架？
麻尾： （大驚） 你依家要去廁所呀？
Gee： （好老成咁話） 唔係，我問下呢到有無廁所楂嗎！

最喜愛的動作

麻尾近來最喜愛Gee做的動作係。。。

Gee 玩玩下無啦啦走過來，然後大叫： 攬字！！！ （姐係攬住的意思）

好sweet呀！ 因爲Gee 真係好似非常情不自禁咁想攬字麻尾！！

幫唔到手

晚飯后埋單。。。

Gee： 唔好俾錢啦！走啦！
麻尾： 你有無帶錢呀？
Gee： 無呀！
麻尾： 無帶錢你要留係到洗碗架wor！
Gee： （從容地回答。。。） 我幫唔到手架。 我會打爛曬d杯架！
麻尾： （奸到你呀。。。）

男人

中午飲茶，爸比打電話到酒樓訂位。。。

爸比： （電話中。。。） 賴小姐，9位。
Gee： （搭嘴。。。） 唔係賴小姐！係賴婷婷小姐！
麻尾： 你係唔係小姐呀？
Gee： 唔係！
麻尾： 咁你係咩呀？
Gee： 男人咯！
麻尾： -_-""

早上之日常

一個普通的早上。。。

麻尾去廁所，Gee 本來話一起刷牙，但見麻尾在去廁所就話一陣先。。。

麻尾： 你準備張樓梯櫈先啦。
Gee： （一邊關門一邊講。。。） 唔好啦！一陣等你去完廁所先啦！
麻尾沒有回答。
Gee： （關門后又開門再講。。。） 一陣等你去完廁所先搬櫈！
麻尾沒有回答。
Gee： （關門后又開門再講。。。） 你聼唔聽到，明唔明白呀？！
麻尾： 聽到！明白！

***********************************************************************

麻尾在廚房飲水時，Gee 拿了一盒雪莎朱古力過來。。。

Gee： 麻尾，送俾你既禮物黎架！
麻尾： 多謝！！
Gee： （好認真地講） 你打開佢睇下。如果係朱古力就爸比一粒，麻尾一粒同我一粒。
麻尾： （有預謀的。。。 -_-" 未免中計收了雪莎后就放起來）
Gee： （過了一陣。。。） 到處找，你開左個禮物為呀？~~

-____-""

學以致用

早上Gee 將爸比的衣服到處掉，爸比開始不高興了。麻尾走出房間時也用不高興的眼神看住Gee。 然後麻尾在廚房飲水時。。。

Gee： （噠噠噠地走過來，用溫柔的聲音。。。）麻尾，你係唔係好嬲呀？
麻尾： （其實並沒有好嬲，但都扮下野。。。） 小小嬲啦。
Gee： 攬住你會唔會唔嬲呀?
麻尾： 會呀！
Gee： （9秒9馬上飛撲過來。。。再加上甜美的聲音） 攬住~~~~！

好的。麻尾完全投降。

Gee竟然記得上次令麻尾極速唔嬲既方法，並馬上學以致用。長大后定會是個冧女高手！

小天使

晚上和婆婆吵了一個小架，雖然麻尾已經盡量控制自己，但Gee 也知道我好嬲。在婆婆家時⋯

Gee：麻尾，你係唔係好嬲呀？
麻尾：（一邊幫Gee穿鞋子⋯）係呀！

落到街，Gee 突然又問⋯

Gee：麻尾，你重係唔係好嬲呀？
麻尾：係呀！
Gee：（用天真的眼神望住麻尾）你可唔可以唔嬲呀？
麻尾：你攬住我就唔嬲啦。
Gee馬上轉身攬住麻尾！！！當時麻尾覺得好慚愧，竟然要Gee tum 返麻尾。Gee 真是一個小天使。

老積

早上麻尾在穿衣服上班。。。

麻尾： 朗言，你可唔可以幫我拉拉鏈呀？（麻尾有條連身裙背後有拉鏈）
Gee： 唔可以呀！我做緊野呀！
麻尾： 。。。
Gee： （幾秒后。。。） 你自己試下拉唔拉到先啦。如果拉唔到我再黎幫你好唔好？
麻尾： （講野咁老積既） 好呀！
Gee： （一陣過後。。。） 你拉唔拉到呀？
麻尾： （真係記得我，好感動~） 拉到啦唔該曬~！

堅持的哥哥

晚飯的時候Gee先吃完，走到舅父旁邊。。。

Gee： 舅父，可唔可以借你房間個個柯帕文機械人比我玩呀？
舅父： 唔得呀，會整爛架。

Gee 沒有發脾氣，自己走開玩。但過左一陣后又問。。。

Gee： 舅父，可唔可以借你房間個個柯帕文比我玩呀？
舅父： 唔好啦，好多塵。

Gee 又走開。不會一陣又再問。。。

Gee： 舅父，可唔可以借你房間個個柯帕文比我玩呀？
舅父： 。。。

整個過程麻尾覺得Gee 好有禮貌，也很尊重舅父的意願。Gee 明白到柯帕文機械人是舅父的，想玩之前一定要得到他同意。如果未拿到同意就一直問，一直問，一直問~~~

可愛的妹妹

剛才回去嫲嫲家餵妹妹，本來妹妹的樣子好可憐，隻眼有眼淚，但認到麻尾後就笑返。
放妹妹在床上，她準備扭計，但見到麻尾除衫就眼甘甘。。。 哈哈哈！好似見到d正野咁! 麻尾真係忍唔住笑~~~

吃左30分鐘仍然在啜。。。 麻尾幫妹妹離口。妹妹醒左，碌大隊眼望左麻尾幾秒後就合埋眼訓返。 好滿足好安心的樣子。

現在有點明白點解d 埋身媽媽到bb 自然離乳個陣會咁唔捨得！

麻尾會提醒自己珍惜這些美妙的時光。

火警

星期六和公公婆婆去合和飲茶，公公約左朋友在下一層的酒樓，飲完茶就自己行樓梯離開。

大家入到電梯。。。

Gee： 公公呢？
麻尾： 公公行樓梯。
Gee： 做mud 野行樓梯呀？都無火警。
麻尾： er。。。（當麻尾係到想緊的時候。。。）
Gee： 佢去搵朋友呀嗎！

搞笑的妹妹

本來妹妹靜靜得躺在BB床上看著床鈴在轉，一切都很平靜。。。 突然妹妹大叫大喊，好似被人打。 麻尾馬上彈起身，見到妹妹右手抓緊自己的頭髮在喊。

原來妹妹玩玩下自己隻手抓住自己的頭髮，覺得疼，就喊。 越緊張隻手就抓得越緊，就覺得越疼。 ^o^ 麻尾要好用力先可以拿開妹妹隻手~

唔一樣的咕咕

麻尾幫妹妹換片，Gee在旁邊看。

Gee：咦？點解個咕咕唔一樣既？
麻尾：（又幾好觀察力wor）因為妹妹係女仔咯。

曳曳同學

麻尾今日終於加入左Gee幼兒園的媽媽Whatsapp Group。裡面有一張上幼信的班相。發現兩個老師一人抱著一個男同學。一個係張思行（Gee話好曳個個同學），另一個係吳朗言！

麻尾：老師點解抱著張思行？
Gee：因為他曳，老師驚他周圍走。
麻尾：老師點解抱著吳朗言？
Gee：因為他乖。
麻尾：（雙重標準到你呀⋯⋯）老師抱著左兩個曳曳。
Gee：抱著一個曳曳。
麻尾：（Gee的自我感覺真係良好⋯）

幸福的麻尾

下午麻尾揹著妹妹出去行街，回到李節街時碰到一位住李節的鄰居。我們覺得她是退休公務員，說話很有禮。朗言剛出生的時候她見到朗言時還說Welcome。

這次見和她擦身而過，點了頭打招呼。走過後，她回頭說⋯

鄰居：你好幸福呀！

是的。麻尾真的感覺好幸福。大家都看得出來～

好乖好乖好乖好乖！

麻尾：你係小小乖定係好乖好乖好乖好乖？
Gee：我係好乖好乖好乖好乖。
麻尾：你係小小曳定係好曳好曳好曳好曳？
Gee：（唔出聲想左一陣）我係好乖好乖好乖好乖！

講價

晚上抱著妹妹和Gee傾計⋯⋯

麻尾：你等妹妹好似你咁兩歲半，你未可以講故事比妹妹聽咯～ 你叫妹妹去圖書閣揀書書。你話講幾多個故事比妹妹聽好？
Gee：一個。
爸比：如果妹妹話兩個呢？
Gee：講一個。

平時Gee會要求講3個故事，爸比麻尾會還價講1個，通常最後會講2個故事成交。現在身份調轉，妹妹要求他講2個故事就無價講～>_<

亞Sir

晚上麻尾講警察叔叔故事⋯

麻尾：亞Sir，姐係警察叔叔。
Gee：（好認真）姐係Sir滑梯個Sir。
麻尾：（忍笑中）係，無錯。

傻豬豬

嫲嫲抱著妹妹，嘗試tum她訓覺。

嫲嫲：傻豬豬，快d訓啦。
Gee：（一直在玩砌圖⋯ 突然搭嘴）佢唔係豬黎架，佢係小朋友。

以為他在玩沒有留意其他人講野，原來一直在聽～

唔等麻尾

半夜麻尾餵完夜奶，看看Gee有沒有蓋被。發現Gee 瀨了尿。幫Gee 換好衣服和床單後，本來想陪Gee睡一下。剛訓上床，妹妹就喊。

麻尾：你等麻尾一陣，我tum完妹妹就返黎同你訓。
Gee：（顫抖的聲音⋯和貓仔的眼神⋯）唔等麻尾好唔好。。。

Aiya⋯⋯麻尾真係好想陪Gee訓，但妹妹開始越喊越大聲，麻尾就只好先處理妹妹，希望儘快tum返她訓就可以同Gee訓。最後tum完妹妹，Gee已經自己訓左⋯

小灰狼

沖完涼，爸比和Gee穿衣服⋯

Gee：我係大灰狼，要食左你呢隻小豬！
爸比：我咁大隻，應該係大豬。你咁細隻應該係小灰狼。小灰狼食唔食到大豬架？
Gee：（好認真地⋯）慢慢食未得咯！Arrmm～ Arrmm～
Gee：（突然指着麻尾）個隻小豬好食d架。好肥架。
麻尾：～_～''

曳同學2

吃早餐的時候爸比讀出班上同學名字，問Gee這些是不是他的同學。聽到同學的名字他會不自覺地微笑，然後話，'係呀。係同學。'

當爸比一直讀同學的名字⋯

Gee：重有個個好曳既同學呢～
爸比：佢叫咩名呀？
Gee：（想了想⋯⋯）張思⋯
爸比：（在名單上找⋯）張思行？
Gee：（奸笑）係呀！！佢好曳架！又喊啦，又搞其他同學d野啦，又唔食野啦，又唔坐係位啦⋯ （如數家珍咁，個八婆仔樣又出現了）～_～

婆婆想看看Gee是不是真的記得同學的名字。

婆婆：（想整蠱Gee）彭定康係唔係你同學？
Gee：唔係呀。

大哥哥

剛才麻尾同Gee玩完貼紙薄，準備訓覺。聽到妹妹在扭計哭，爸比在冧妹妹睡覺。

Gee：麻尾，BB女喊呀。想食奶奶，你出去餵奶奶比佢飲啦。
麻尾：朗言哥哥真係好錫妹妹。咁我換爸比入來同你訓好無？
Gee：好！我去叫爸比。

看着Gee的背影覺得他已經慢慢接受妹妹是家庭的新成員。你們要相親相愛呀！

曳同學？

爸比和Gee傾計⋯

爸比：你隔離個同學係唔係彭子菁？
Gee：唔係呀！係第二個同學。佢好曳架，成日搣吳朗言塊面！（語氣像講人壞話的八婆仔，邊講邊反白眼）
爸比：咁佢叫咩名？
Gee：唔知呀。但係老師知佢叫咩名。

反白眼個樣同d語氣真係好好笑。

沖涼

今天晚上Gee 不自己吃飯，麻尾鬧左他幾句。飯後⋯

麻尾：麻尾同你沖涼好唔好？
Gee：（冷靜地回答）我想唔同你沖涼。
麻尾：⋯

下午茶

星期日Gee 訓醒下午覺，爸比叫他吃河粉⋯

爸比：快d來食河粉啦，好好食架。
Gee：唔食啦，我要做工程。
爸比：食左先做啦，如果唔係凍左就唔好食架啦。
Gee：唔係呀！凍d好食d架！

～_～ 捩橫折曲⋯

Peaceful

Watching a sleeping baby in your arms makes you peaceful and content.

麻尾泵奶奶

妹妹近來埋身得唔錯，d 奶泵出來到最後都係倒，所以早上沒有沖奶粉比Gee，浸左支雪奶比Gee。Gee飲左大半支，然後。。。
Gee： 麻尾，我唔飲啦。唔好飲既。。。
麻尾： （坦白地。。。）呢支係麻尾泵奶奶黎架，唔好飲呀。。。 下次再試下啦。
第二天，麻尾把剛剛泵完的奶奶比Gee 飲，這次一早説明係麻尾泵奶奶，點知。。。
Gee： （飲左唔夠幾啖。。。）麻尾，沖奶粉！~~
>_<~~~ 麻尾好傷心~ 嗚嗚嗚~~

我有鼻可以吸吸水

早前Gee 在學校學了首歌，內容是講有隻小大笨象的鼻子打了個結⋯ 歌詞是 '我有鼻可以吸吸水～'

那天我們在看故事書，有隻大笨象用鼻子捲起木頭。

麻尾：呢隻大笨象係到做咩呀？我有鼻可以⋯ （麻尾以為Gee會繼續講吸吸水）
Gee：（繼續唱⋯）我有鼻可以捲捲木。
麻尾：（驚訝⋯ 另外一幅圖畫是大象的鼻子在噴水。麻尾認為這次會唱吸吸水）咁呢隻大笨象又係到做咩呀？
Gee：我有鼻可以噴噴水。
麻尾：（繼續驚訝⋯）大笨象可以用鼻食咩呀？我有鼻可以食香蕉。
Gee：（古靈精怪的樣子）我有鼻可以食食香蕉～

Gee 會重複動詞，句子結構和之前的一樣，沒有完全跟麻尾的例句。^_^

浸奶奶

爸比晚上同Gee講故事和陪訓，麻尾正在餵奶比妹妹。Gee 開門走過來⋯

Gee：麻尾，可唔可以同我訓呀？
麻尾：你今晚同爸比訓啦，我要餵奶奶比妹妹。
Gee：浸奶奶比妹妹呀。

爸比麻尾都驚嘆Gee的提議，又的確可以同時解決妹妹吃奶問題和麻尾陪Gee訓的安排。Very impressive!!!

朗言哥哥

昨晚Gee 回家後如常拿玩具出來玩，雖然沒有故意大聲，但聲浪足以嘈醒妹妹。妹妹被嘈醒自然大哭⋯

Gee：（一邊玩玩具，一邊平靜地說⋯）好啦，好啦。朗言哥哥返左黎啦。（語氣好似話哥哥現在返黎啦，你唔洗喊啦）

'好啦，好啦。' 係我們通常在妹妹哭鬧時會講的⋯ 原來Gee 也有留意。

返學

第三天上學的早上，Gee 如常地在廳玩玩具。突然Gee 自言自語地發出好似唱歌的聲音。。。

Gee：⋯⋯ 吸吸水⋯

麻尾以為Gee 是隨意地發出聲音又或自己創作歌仔。但爸比突然非常驚訝⋯

爸比：你竟然記得點唱？
麻尾：歌來的嗎？
爸比：這是老師講故事時唱的歌，'我有鼻可以吸吸水～'。邊個吸唔到水呀？
Gee：（邊玩玩具，邊不經意的回答）大笨象咯。
爸比：點解吸唔到水？
Gee：因為佢個鼻打左個結。
爸比：後來邊個幫佢解返開？
Gee：大笨象麻尾。

爸比話老師講故事的時候Gee 並不留心，沒有想到他除了記得故事內容還記得首歌怎樣唱。

大哥哥

妹妹剛回家幾天，Gee 和爸比訓覺時妹妹喊食奶。

Gee：爸比你出去睇妹妹啦。
爸比：唔洗啦。麻尾會照顧妹妹。
Gee：嗯。

Gee 將會是個好哥哥。

口水尾

星期六和公公婆婆飲茶，叫了一碟煎蝦餅。 Gee自己夾了一整塊到自己的碗。 Gee 吃得津津有味。 吃到一半。。。

爸比： 比一半我食啦。 （然後伸手去夾走Gee 碗裏的蝦餅）
Gee： （用手撥開爸比） 唔得呀！有口水尾呀！

-_-" 平時他想吃大人的東西我們就會話有口水尾，唔比他食。 現在他用同一方法唔俾爸比食蝦餅~~

9:52

晚上回家后集體賴在床上。。。 Gee 發現麻尾的電話在枕頭邊，就拿起來。。。

Gee： 2。。。5。。。9
Gee： 9點5十2。。。

爸比和麻尾同時覺得好驚訝！我們知道Gee 知道是9點，但沒有想到他會講到52。。。 雖然好大可能這次是撞彩，但都好surprise~~

講道理

早上麻尾在刷牙，爸比在房間替Gee 穿襪子。。。

Gee： （很有禮貌地。。。） 爸比我今日無吐口水呀，可唔可以比我食一粒麥提莎？
（麻尾心想應該都可以比呀。。。而且Gee 那麽有禮貌）

爸比： 但係你琴日有小小曳，係唔係？
Gee： （好誠實！） 係。
爸比： 咁曳有無得食麥提莎？
Gee： 無！（完全沒有發脾氣，好講道理）
爸比： 如果今天乖又無吐口水，今晚就比你食啦，好無？
Gee： 好！

Good son and Good Dad. :)

老積仔

有一晚在嫲嫲家吃飯， 大家在吃飯， Gee 就自己玩積木。 爺爺讚Gee 自己玩積木。 點知。。。

Gee： 你食飯就唔好講野啦！（語氣認真， 樣子堅定）

（全場大笑。。。 都唔知道幾時係邊度學的，但又用的arm）

-----------------------------------------------------------

早上麻尾在刷牙，Gee 拿住玩具走過來，麻尾就問下：

麻尾： 你今日咁早就開工做工程啦？
Gee： （指住麻尾） 你刷牙就唔好講野啦！跌曬d 牙膏出來啦！
麻尾： （滴汗中。。。） 知道。

浮誇

麻尾昨晚換了一套全新得 LEONA 睡衣，好老套的款式，但穿起來好舒服，而且還是 Winnie The Pooh 公仔。 早上只有麻尾和Gee 在。 麻尾去廁所，Gee 一眼就看得出這套是新衫。

Gee： 嘩！（高音） 你件衫好靚呀~~~~~ （個樣子好真誠！） 重有 Pigpig 添呀！
麻尾： （洗唔洗咁誇張呀! 不過又真係幾好眼力！ 新衫都知道。）

抽筋

麻尾前幾晚突然抽筋。 早上的時候同 Gee 講：

麻尾： Gee 呀! 麻尾琴晚抽筋呀！隻腳好疼！

Gee 二話不説，9秒9走過來幫我按摩隻腳。 麻尾好感動呀！！！！！

管家佬

昨晚回家后爸比去洗腳， 然後坐在沙發上。。。

Gee： 哎呀！你做乜唔抹腳呀？ （好嫌棄的語氣）

麻尾走去看看， 爸比的腳上確實有水珠。

Gee： 等我拿塊布比你抹啦！ 我好好人架！

-_____-""

講條件

平時每天晚上麻尾都會同Gee 講故事先訓覺。 但近來Gee 經常lur 口水。 我們就話如果那天有lur 口水晚上就不會講故事。 第一晚的時候Gee 眼濕濕， 好委屈的樣子。 第二天情況有所改善，但還是有lur。 爸比就話， 如果明天再lur， Gee 就要自己訓覺，爸比，麻尾唔會陪訓。

第三日，睡覺時Gee 選好故事書。。。（麻尾雖然不講故事， 但Gee 可以自己看完故事先訓）

Gee： 麻尾， 你講故事比我聼呀！
麻尾： 你今日有lur 口水， 無得講故事呀。
Gee： （自言自語） 麻尾， 你講故事比我聼我就自己訓， 好無？
麻尾： （驚訝中） 你係唔係話自己訓呀？

。。。。 （沒有回應。。。） 可能想過都係唔著數。

Thomas The Train

原來小朋友真係會好喜歡 Thomas 火車頭的卡通。 對於大人來講那些火車頭個個樣子差不多，但小朋友就好容易看得出分別和記得他們的名字。 這天麻尾打印左 Thomas 和他的一些火車頭朋友比Gee。

Gee： （指住其中一個） 呢個叫咩名呀？
麻尾： 呢個叫Spencer。
Gee： （大聲重復） Bancer！
麻尾： （笑。。。） 唔係Bancer，係 SSSS bancer。
Gee： Bancer SSSS
麻尾： （笑。。。笑。。。笑）

Gee： （指住另外一個） 呢個叫 Aims。
麻尾： （看看名字。。。笑） 呢個叫James！