雖然平時大部分時間Gee 都不是對妹妹有太大興趣，但從小事可以看得出他還是關心妹妹的。
假期我們在大枱吃下午茶，Gee 大個可以和我們一起吃。 妹妹就坐在 high chair。
妹妹坐了一會兒不耐煩，開始大叫。 我們只是安撫妹妹叫她不要嘈。
反而Gee 就走過去把妹妹的 high chair 拉過來。 話妹妹喜歡接近我們。 果然，妹妹沒有大叫了。 ^-^
***********************************************************************
假期的下午，Gee 睡醒午覺，妹妹還在睡。 樓上傳來電鑽聲音。。。
Gee： 你可唔可以叫佢細聲d呀？我怕佢嘈到妹妹呀！
^__^
Gee 在玩Thomas 的拼圖。 有一張大的彩色圖片上面有整個拼圖完整的樣子。 Gee 自己一邊玩一邊自言自語。。。
Gee： 當我地出曬街既時候呢，d 火車會自己走出來架~
Gee： 然後呢，就會得返一張白紙架啦！
----------------------------------------------------------------------
晚上沖涼后麻尾幫Gee 吹頭。。。
Gee： （吹到一半） d 濕去做邊度呀？
爸比麻尾都有點驚訝會這樣問。
新年的時候和公公婆婆，爺爺嫲嫲在酒樓晚飯。 嫲嫲叫Gee 數人數。。。
Gee： （逐個逐個數。。。） 1，2，3，4，5，6，7 （加埋自己！）
大家正想拍手讚揚，嫲嫲突然話。。。
嫲嫲： 唔係7個，重有呢個呢？（指住在bb車上的妹妹） 再數過啦~
大家以爲 Gee 會由頭開始數過，點知。。。
Gee： （不慌不忙地望住在bb車上的妹妹。。。） 8
大家都被Gee逗得很開心！！
早上和Gee上學坐的士經過利東街。。。
麻尾： 琴日你係唔係同婆婆黎呢到影相？
Gee： 係呀！佢叫我擺鋪士，鋪士。都唔知鋪乜野士。。。 （Gee的表情和語氣有點無奈,但好好笑）
到學校門口后。。。
的士司機： 你快d 返學入去擺鋪士啦~~
司機叔叔應該覺得我們的對話好好笑~
今日一早麻尾起床走出廳后，Gee 第一句就同麻尾講生日快樂~~ 麻尾開心到獎Gee 飲朱古力奶！！
然後當麻尾刷牙，Gee痾屎時。。。
Gee： 我今日唔返學同麻尾慶祝生日快樂啦，好唔好呀？
麻尾： （咁都比你諗到！） "___"
天氣冷，婆婆提早帶Gee 回家。 麻尾回家后。。。
Gee： （Gee 拿住一個金莎朱古力） 麻尾你食唔食金莎呀？
麻尾： 食呀！
婆婆： 今日有人送左一盒金莎比公公， 公公問朗言一起食好唔好， 朗言話唔好啦， 留返黎送俾麻尾做生日禮物！
好感動！！ 盒金莎沒有開過， 整盒準備送俾麻尾！！好冧呀！！
爸比： 你識唔識望班d老師架？
Gee： 識呀！有朱老師啦~ 佢屋企有好多豬豬架！
爸比： 葉老師屋企係唔係有好多葉呀？
Gee： 係呀！
麻尾： 咁李主任屋企呢？
Gee： 有好多梨咯！
麻尾： 咁賴冠華屋企呢？
Gee： （有一點點偷笑。。。） 有好多賴咯！
麻尾： （竟然識得咁玩。。。） 咁吳朗言屋企呢？
Gee： （笑。。。） 有好多吳咯！！ 呵呵呵呵~~
一個普通的早上。。。
麻尾去廁所，Gee 本來話一起刷牙，但見麻尾在去廁所就話一陣先。。。
麻尾： 你準備張樓梯櫈先啦。
Gee： （一邊關門一邊講。。。） 唔好啦！一陣等你去完廁所先啦！
麻尾沒有回答。
Gee： （關門后又開門再講。。。） 一陣等你去完廁所先搬櫈！
麻尾沒有回答。
Gee： （關門后又開門再講。。。） 你聼唔聽到，明唔明白呀？！
麻尾： 聽到！明白！
***********************************************************************
麻尾在廚房飲水時，Gee 拿了一盒雪莎朱古力過來。。。
Gee： 麻尾，送俾你既禮物黎架！
麻尾： 多謝！！
Gee： （好認真地講） 你打開佢睇下。如果係朱古力就爸比一粒，麻尾一粒同我一粒。
麻尾： （有預謀的。。。 -_-" 未免中計收了雪莎后就放起來）
Gee： （過了一陣。。。） 到處找，你開左個禮物為呀？~~
-____-""
早上Gee 將爸比的衣服到處掉，爸比開始不高興了。麻尾走出房間時也用不高興的眼神看住Gee。 然後麻尾在廚房飲水時。。。
Gee： （噠噠噠地走過來，用溫柔的聲音。。。）麻尾，你係唔係好嬲呀？
麻尾： （其實並沒有好嬲，但都扮下野。。。） 小小嬲啦。
Gee： 攬住你會唔會唔嬲呀?
麻尾： 會呀！
Gee： （9秒9馬上飛撲過來。。。再加上甜美的聲音） 攬住~~~~！
好的。麻尾完全投降。
Gee竟然記得上次令麻尾極速唔嬲既方法，並馬上學以致用。長大后定會是個冧女高手！
晚上和婆婆吵了一個小架，雖然麻尾已經盡量控制自己，但Gee 也知道我好嬲。在婆婆家時⋯
Gee：麻尾，你係唔係好嬲呀？
麻尾：（一邊幫Gee穿鞋子⋯）係呀！
落到街，Gee 突然又問⋯
Gee：麻尾，你重係唔係好嬲呀？
麻尾：係呀！
Gee：（用天真的眼神望住麻尾）你可唔可以唔嬲呀？
麻尾：你攬住我就唔嬲啦。
Gee馬上轉身攬住麻尾！！！當時麻尾覺得好慚愧，竟然要Gee tum 返麻尾。Gee 真是一個小天使。
早上麻尾在穿衣服上班。。。
麻尾： 朗言，你可唔可以幫我拉拉鏈呀？（麻尾有條連身裙背後有拉鏈）
Gee： 唔可以呀！我做緊野呀！
麻尾： 。。。
Gee： （幾秒后。。。） 你自己試下拉唔拉到先啦。如果拉唔到我再黎幫你好唔好？
麻尾： （講野咁老積既） 好呀！
Gee： （一陣過後。。。） 你拉唔拉到呀？
麻尾： （真係記得我，好感動~） 拉到啦唔該曬~！
晚飯的時候Gee先吃完，走到舅父旁邊。。。
Gee： 舅父，可唔可以借你房間個個柯帕文機械人比我玩呀？
舅父： 唔得呀，會整爛架。
Gee 沒有發脾氣，自己走開玩。但過左一陣后又問。。。
Gee： 舅父，可唔可以借你房間個個柯帕文比我玩呀？
舅父： 唔好啦，好多塵。
Gee 又走開。不會一陣又再問。。。
Gee： 舅父，可唔可以借你房間個個柯帕文比我玩呀？
舅父： 。。。
整個過程麻尾覺得Gee 好有禮貌，也很尊重舅父的意願。Gee 明白到柯帕文機械人是舅父的，想玩之前一定要得到他同意。如果未拿到同意就一直問，一直問，一直問~~~
剛才回去嫲嫲家餵妹妹，本來妹妹的樣子好可憐，隻眼有眼淚，但認到麻尾後就笑返。
放妹妹在床上，她準備扭計，但見到麻尾除衫就眼甘甘。。。 哈哈哈！好似見到d正野咁! 麻尾真係忍唔住笑~~~
吃左30分鐘仍然在啜。。。 麻尾幫妹妹離口。妹妹醒左，碌大隊眼望左麻尾幾秒後就合埋眼訓返。 好滿足好安心的樣子。
現在有點明白點解d 埋身媽媽到bb 自然離乳個陣會咁唔捨得！
麻尾會提醒自己珍惜這些美妙的時光。
麻尾今日終於加入左Gee幼兒園的媽媽Whatsapp Group。裡面有一張上幼信的班相。發現兩個老師一人抱著一個男同學。一個係張思行（Gee話好曳個個同學），另一個係吳朗言！
麻尾：老師點解抱著張思行？
Gee：因為他曳，老師驚他周圍走。
麻尾：老師點解抱著吳朗言？
Gee：因為他乖。
麻尾：（雙重標準到你呀⋯⋯）老師抱著左兩個曳曳。
Gee：抱著一個曳曳。
麻尾：（Gee的自我感覺真係良好⋯）
下午麻尾揹著妹妹出去行街，回到李節街時碰到一位住李節的鄰居。我們覺得她是退休公務員，說話很有禮。朗言剛出生的時候她見到朗言時還說Welcome。
這次見和她擦身而過，點了頭打招呼。走過後，她回頭說⋯
鄰居：你好幸福呀！
是的。麻尾真的感覺好幸福。大家都看得出來～
晚上抱著妹妹和Gee傾計⋯⋯
麻尾：你等妹妹好似你咁兩歲半，你未可以講故事比妹妹聽咯～ 你叫妹妹去圖書閣揀書書。你話講幾多個故事比妹妹聽好？
Gee：一個。
爸比：如果妹妹話兩個呢？
Gee：講一個。
平時Gee會要求講3個故事，爸比麻尾會還價講1個，通常最後會講2個故事成交。現在身份調轉，妹妹要求他講2個故事就無價講～>_<
半夜麻尾餵完夜奶，看看Gee有沒有蓋被。發現Gee 瀨了尿。幫Gee 換好衣服和床單後，本來想陪Gee睡一下。剛訓上床，妹妹就喊。
麻尾：你等麻尾一陣，我tum完妹妹就返黎同你訓。
Gee：（顫抖的聲音⋯和貓仔的眼神⋯）唔等麻尾好唔好。。。
Aiya⋯⋯麻尾真係好想陪Gee訓，但妹妹開始越喊越大聲，麻尾就只好先處理妹妹，希望儘快tum返她訓就可以同Gee訓。最後tum完妹妹，Gee已經自己訓左⋯
沖完涼，爸比和Gee穿衣服⋯
Gee：我係大灰狼，要食左你呢隻小豬！
爸比：我咁大隻，應該係大豬。你咁細隻應該係小灰狼。小灰狼食唔食到大豬架？
Gee：（好認真地⋯）慢慢食未得咯！Arrmm～ Arrmm～
Gee：（突然指着麻尾）個隻小豬好食d架。好肥架。
麻尾：～_～''
吃早餐的時候爸比讀出班上同學名字，問Gee這些是不是他的同學。聽到同學的名字他會不自覺地微笑，然後話，'係呀。係同學。'
當爸比一直讀同學的名字⋯
Gee：重有個個好曳既同學呢～
爸比：佢叫咩名呀？
Gee：（想了想⋯⋯）張思⋯
爸比：（在名單上找⋯）張思行？
Gee：（奸笑）係呀！！佢好曳架！又喊啦，又搞其他同學d野啦，又唔食野啦，又唔坐係位啦⋯ （如數家珍咁，個八婆仔樣又出現了）～_～
婆婆想看看Gee是不是真的記得同學的名字。
婆婆：（想整蠱Gee）彭定康係唔係你同學？
Gee：唔係呀。
剛才麻尾同Gee玩完貼紙薄，準備訓覺。聽到妹妹在扭計哭，爸比在冧妹妹睡覺。
Gee：麻尾，BB女喊呀。想食奶奶，你出去餵奶奶比佢飲啦。
麻尾：朗言哥哥真係好錫妹妹。咁我換爸比入來同你訓好無？
Gee：好！我去叫爸比。
看着Gee的背影覺得他已經慢慢接受妹妹是家庭的新成員。你們要相親相愛呀！
爸比和Gee傾計⋯
爸比：你隔離個同學係唔係彭子菁？
Gee：唔係呀！係第二個同學。佢好曳架，成日搣吳朗言塊面！（語氣像講人壞話的八婆仔，邊講邊反白眼）
爸比：咁佢叫咩名？
Gee：唔知呀。但係老師知佢叫咩名。
反白眼個樣同d語氣真係好好笑。
星期日Gee 訓醒下午覺，爸比叫他吃河粉⋯
爸比：快d來食河粉啦，好好食架。
Gee：唔食啦，我要做工程。
爸比：食左先做啦，如果唔係凍左就唔好食架啦。
Gee：唔係呀！凍d好食d架！
～_～ 捩橫折曲⋯
妹妹近來埋身得唔錯，d 奶泵出來到最後都係倒，所以早上沒有沖奶粉比Gee，浸左支雪奶比Gee。Gee飲左大半支，然後。。。
Gee： 麻尾，我唔飲啦。唔好飲既。。。
麻尾： （坦白地。。。）呢支係麻尾泵奶奶黎架，唔好飲呀。。。 下次再試下啦。
第二天，麻尾把剛剛泵完的奶奶比Gee 飲，這次一早説明係麻尾泵奶奶，點知。。。
Gee： （飲左唔夠幾啖。。。）麻尾，沖奶粉！~~
>_<~~~ 麻尾好傷心~ 嗚嗚嗚~~
早前Gee 在學校學了首歌，內容是講有隻小大笨象的鼻子打了個結⋯ 歌詞是 '我有鼻可以吸吸水～'
那天我們在看故事書，有隻大笨象用鼻子捲起木頭。
麻尾：呢隻大笨象係到做咩呀？我有鼻可以⋯ （麻尾以為Gee會繼續講吸吸水）
Gee：（繼續唱⋯）我有鼻可以捲捲木。
麻尾：（驚訝⋯ 另外一幅圖畫是大象的鼻子在噴水。麻尾認為這次會唱吸吸水）咁呢隻大笨象又係到做咩呀？
Gee：我有鼻可以噴噴水。
麻尾：（繼續驚訝⋯）大笨象可以用鼻食咩呀？我有鼻可以食香蕉。
Gee：（古靈精怪的樣子）我有鼻可以食食香蕉～
Gee 會重複動詞，句子結構和之前的一樣，沒有完全跟麻尾的例句。^_^
第三天上學的早上，Gee 如常地在廳玩玩具。突然Gee 自言自語地發出好似唱歌的聲音。。。
Gee：⋯⋯ 吸吸水⋯
麻尾以為Gee 是隨意地發出聲音又或自己創作歌仔。但爸比突然非常驚訝⋯
爸比：你竟然記得點唱？
麻尾：歌來的嗎？
爸比：這是老師講故事時唱的歌，'我有鼻可以吸吸水～'。邊個吸唔到水呀？
Gee：（邊玩玩具，邊不經意的回答）大笨象咯。
爸比：點解吸唔到水？
Gee：因為佢個鼻打左個結。
爸比：後來邊個幫佢解返開？
Gee：大笨象麻尾。
爸比話老師講故事的時候Gee 並不留心，沒有想到他除了記得故事內容還記得首歌怎樣唱。
星期六和公公婆婆飲茶，叫了一碟煎蝦餅。 Gee自己夾了一整塊到自己的碗。 Gee 吃得津津有味。 吃到一半。。。
爸比： 比一半我食啦。 （然後伸手去夾走Gee 碗裏的蝦餅）
Gee： （用手撥開爸比） 唔得呀！有口水尾呀！
-_-" 平時他想吃大人的東西我們就會話有口水尾，唔比他食。 現在他用同一方法唔俾爸比食蝦餅~~
晚上回家后集體賴在床上。。。 Gee 發現麻尾的電話在枕頭邊，就拿起來。。。
Gee： 2。。。5。。。9
Gee： 9點5十2。。。
爸比和麻尾同時覺得好驚訝！我們知道Gee 知道是9點，但沒有想到他會講到52。。。 雖然好大可能這次是撞彩，但都好surprise~~
早上麻尾在刷牙，爸比在房間替Gee 穿襪子。。。
Gee： （很有禮貌地。。。） 爸比我今日無吐口水呀，可唔可以比我食一粒麥提莎？
（麻尾心想應該都可以比呀。。。而且Gee 那麽有禮貌）
爸比： 但係你琴日有小小曳，係唔係？
Gee： （好誠實！） 係。
爸比： 咁曳有無得食麥提莎？
Gee： 無！（完全沒有發脾氣，好講道理）
爸比： 如果今天乖又無吐口水，今晚就比你食啦，好無？
Gee： 好！
Good son and Good Dad. :)
有一晚在嫲嫲家吃飯， 大家在吃飯， Gee 就自己玩積木。 爺爺讚Gee 自己玩積木。 點知。。。
Gee： 你食飯就唔好講野啦！（語氣認真， 樣子堅定）
（全場大笑。。。 都唔知道幾時係邊度學的，但又用的arm）
-----------------------------------------------------------
早上麻尾在刷牙，Gee 拿住玩具走過來，麻尾就問下：
麻尾： 你今日咁早就開工做工程啦？
Gee： （指住麻尾） 你刷牙就唔好講野啦！跌曬d 牙膏出來啦！
麻尾： （滴汗中。。。） 知道。
麻尾昨晚換了一套全新得 LEONA 睡衣，好老套的款式，但穿起來好舒服，而且還是 Winnie The Pooh 公仔。 早上只有麻尾和Gee 在。 麻尾去廁所，Gee 一眼就看得出這套是新衫。
Gee： 嘩！（高音） 你件衫好靚呀~~~~~ （個樣子好真誠！） 重有 Pigpig 添呀！
麻尾： （洗唔洗咁誇張呀! 不過又真係幾好眼力！ 新衫都知道。）
昨晚回家后爸比去洗腳， 然後坐在沙發上。。。
Gee： 哎呀！你做乜唔抹腳呀？ （好嫌棄的語氣）
麻尾走去看看， 爸比的腳上確實有水珠。
Gee： 等我拿塊布比你抹啦！ 我好好人架！
-_____-""
平時每天晚上麻尾都會同Gee 講故事先訓覺。 但近來Gee 經常lur 口水。 我們就話如果那天有lur 口水晚上就不會講故事。 第一晚的時候Gee 眼濕濕， 好委屈的樣子。 第二天情況有所改善，但還是有lur。 爸比就話， 如果明天再lur， Gee 就要自己訓覺，爸比，麻尾唔會陪訓。
第三日，睡覺時Gee 選好故事書。。。（麻尾雖然不講故事， 但Gee 可以自己看完故事先訓）
Gee： 麻尾， 你講故事比我聼呀！
麻尾： 你今日有lur 口水， 無得講故事呀。
Gee： （自言自語） 麻尾， 你講故事比我聼我就自己訓， 好無？
麻尾： （驚訝中） 你係唔係話自己訓呀？
。。。。 （沒有回應。。。） 可能想過都係唔著數。
原來小朋友真係會好喜歡 Thomas 火車頭的卡通。 對於大人來講那些火車頭個個樣子差不多，但小朋友就好容易看得出分別和記得他們的名字。 這天麻尾打印左 Thomas 和他的一些火車頭朋友比Gee。
Gee： （指住其中一個） 呢個叫咩名呀？
麻尾： 呢個叫Spencer。
Gee： （大聲重復） Bancer！
麻尾： （笑。。。） 唔係Bancer，係 SSSS bancer。
Gee： Bancer SSSS
麻尾： （笑。。。笑。。。笑）
Gee： （指住另外一個） 呢個叫 Aims。
麻尾： （看看名字。。。笑） 呢個叫James！
冰箱裏面有幾杯細的雪糕，Gee成日拿出來話要食。 之前冬天我們就話現在太凍啦，要等夏天熱d先。 早前去玩海洋公園后就比了Gee 吃一杯雪糕。 這幾天天氣熱，回家后都會比Gee 吃小小雪糕。
昨天早上準備出門口去嫲嫲家時，Gee 突然開冰箱拿出雪糕。。。
Gee： 不如依家食雪糕呀？
麻尾： 依家唔食，要走啦。
Gee： （自己喃喃自語。。。） 依家夏天啦，好熱，可以食雪糕啦。。。
昨天麻尾工作繁忙，感覺好累。回家躺在床上，Gee在旁邊的bb床吃手指。
麻尾： 麻尾今日好累呀!
Gee： （馬上起身哄個嘴過來鍚左麻尾一啖！）
麻尾： （甜到暈左） 麻尾好開心呀！
Gee： （用超嗲的聲綫） 麻尾~~
麻尾： （已經不覺得累了） 你叫得咁好聽既？
Gee： （繼續。。。） 麻尾~~ 麻尾~~ （然後偷笑）
Gee 近來成日拿住張有各種剷泥車的卡紙要求買曬上面的所有車。
Gee： 爸比，我想買呢個，呢個同埋呢個，全部買曬返來，好無？
爸比： 第一，屋企已經無位。第二，你都未玩曬d玩具。
Gee： （馬上回答） 第二，我已經玩曬d玩具啦！
上星期六大舅父生日在皇室堡設宴， 我們和Gee 在大堂等電梯。 Gee 被玩具反斗城的標誌吸引， 遲遲都唔肯入電梯， 眼定定咁望住個招牌。 入到電梯。。。
Gee： 不如我地去7樓呀？
麻尾： （心想你又知7樓有好野？） 7樓有咩睇呀？
Gee： 有玩具反斗城咯！
麻尾： （呀。。。 原來真係識睇招牌同數字。。）
2015年6月17日， Gee 2嵗半了！ 那晚剛好太婆過來灣仔復診，晚上一起在酒樓吃飯！ 由於爸比去打高爾夫球， 麻尾放工后去接GeeGee。 途徑 Teresa 餅店， 打算買一個小蛋糕一起慶祝。
當時只剩下4個比較小的蛋糕， 麻尾比較喜歡右面的那3個。
麻尾： （指著右邊那3個蛋糕） Gee，這裡 1 2 3 個蛋糕， 你想要邊個呀？
Gee： （指住第4個蛋糕） 要依個！
麻尾： （-_-""。。。 不要放棄，再問多次） 這裡 1 2 3 個蛋糕， 你想要邊個呀？
Gee： （目光堅定， 繼續指住第4個蛋糕） 要依個！
好的！既然比Gee 選擇就要尊重結果，所以麻尾就買左Gee 選的蛋糕！好似是果仁 Mouse cake。 結果大家都話這個蛋糕好好吃， 連爸比都話好味道！！ ^-^
Gee 由bb 床爬上大人床，在麻尾頭上走過去窗臺。。。
麻尾： 小心唔好踩到麻尾d頭髮呀！
Gee 在麻尾頭上走過。。。 並踩到麻尾頭髮。。。
麻尾： Ousi。。。 好疼呀！
Gee： （馬上趴低。。。） 等我鍚返你就唔痛架啦！ *ummwah* ^o^
麻尾昨天收到醫院來電告知糖尿測試不合格。。。心情低落。
麻尾： GeeGee 麻尾唔開心呀。。。
Gee： 做咩野唔開心呀？抽筋？
麻尾： （你又知道咩係抽筋？！） 我糖尿測試不合格。。。
Gee： 糖尿病！
麻尾： 係呀！
Gee 然後馬上"哄"個頭過來鍚左麻尾個嘴一啖！
麻尾： （心心眼） 麻尾依家開心返啦！ ^o^
Gee： （看了看叔叔後。。。） 麻尾，點解呢個叔叔無頭髮既？
（麻尾和爸比相望了一下。。。一片寧靜~~）
Gee： （再問） 點解呢個叔叔無頭髮既？
（麻尾偷看了光頭叔叔一眼，他面部沒有表情。。。感覺有點不好意思同無奈）
麻尾： 因爲叔叔剪短左d頭髮，如果你剪斷曬d頭髮都會咁架。
^_^ 童言無忌！
星期日和婆婆吃完翠華早餐，Gee 要求去天地圖書看書，因爲天氣太曬和熱，不去遊樂場了。
在天地圖書Gee 又在拉 Peppa Pig 那輛積木車，爸比在講電話，麻尾在看書。。。 突然Gee 走過來。。。
Gee： 麻尾，我想痾屎屎。
麻尾： （大驚~ 並馬上通知爸比~）
爸比： （馬上掛上電話並抱起Gee） 忍住呀， 爸比同你坐"快車"返屋企痾屎屎。
然後爸比抱去Gee 就一支箭咁走左，麻尾好努力地追在後面。。。 都追唔到。。。 只好不時和Gee 揮手~
回到家發現Gee 真係可以控制回到家先痾屎屎！值得一再讚賞！！
訓醒下午覺和Gee 傾計。。。
麻尾： 朗言你幫麻尾去惠康買三明治，唔該，依家買！！
Gee： 好呀！
麻尾然後講述由出家門口怎樣走去惠康，然後排隊比錢，再走路回家。 突然發現入到電梯Gee 未必夠高按16樓！
麻尾： 你依家未夠高按16樓， 等你大個d 先幫麻尾買三明治啦！
Gee： 等到7嵗先啦。
麻尾： （不虞有詐） 系啦！7嵗就夠高啦！
Gee： （打蛇隨棍上。。。） 7嵗就可以買17樓個個玩具啦，到時公公會教你玩架！
麻尾： 。。。 （到現在還念念不忘合和17樓書店裏面的一盒寫住比7嵗以上小朋友玩的模型玩具） -_-"
BB 床一邊的圍欄之前拆了出來讓Gee 習慣訓小童床。 拆了出來的圍欄就"seep" 系床邊， Gee 成日將它拉出來擋住房門口。 昨晚他又把圍欄拉了出來。
這次他在房外，想進來。 進來前他用拳頭輕輕按了房門一下，並發出 "嘟" 的聲音， 然後才拉開圍欄進入房間。 入房后又再"嘟"一下先把圍欄再關上。
爸比見狀，問：
爸比： 可唔可以嘟我入去呀？
Gee： 可以呀~
然後幫爸比"嘟"入房，再嘟多一次關上圍欄。 個樣好滿足有人跟隨他的規矩。
星期六我們坐Uber車去阿煇叔叔生日會， 在路上麻尾和Gee 傾計。。。
麻尾： 你有無朋友架？
Gee： 有呀！
麻尾： 邊個係你朋友呀？
Gee： （理所當然地） 麻尾咯！
麻尾： （頓時覺得好感動又開心） 多謝你呀！！
希望我們一直都是最好的朋友~~
晚上沖完涼Gee走到沙發上， 爸比麻尾兩人合力幫Gee 穿衣服。 爸比嘗試轉移Gee 視線。。。
爸比： 你朝早叫麻尾幫你做咩呀？
Gee： 麻尾， 沖奶奶比朗言飲， 依家沖， 唔該！
爸比： 麻尾跟住講咩呀？
Gee： 等鬧鐘響先。
爸比： 然後你講咩呀？
Gee： 依家飲。
爸比： 跟住呢？
Gee： 跟住話要痾尿！
-__-" GeeGee 知道叫麻尾沖奶， 麻尾系唔會馬上沖。。。 但如果話想痾尿麻尾就會立即起身。。。
印尼姐姐： 小朋友你去邊到呀？
Gee： 去結婚呀！
印尼姐姐： （大笑~~~） 同邊個結婚呀？
Gee： 同麻尾！
星期日早上爸比要幫藝叔叔做兄弟，6點多就要起床。 鬧鐘也把Gee整醒。 爸比在廁所沖涼， Gee過來bb床后沒多久，自己走出廳。 麻尾太眼訓，覺得Gee 只是出廳玩玩具， 沒有理會。
聽到打開櫃子搜索的聲音，然後突然聽到"滴滴答答"的水聲。。。 心想不妙！！ GeeGee 在外面小便！！ 唉。。。 心想一陣又要清潔。 GeeGee "撻撻撻" 地走囘房間， 還未穿囘褲子。
麻尾： 你痾尿呀？
Gee： 係呀！痾左系個沙灘桶到
麻尾： 有沒有痾到周圍都濕曬？
Gee： 無呀！
麻尾好懷疑， 於是走出去看看， 點知真係沒有整濕地方。 個沙灘桶安好地在廳中間， 周圍都沒有整濕。 好厲害！！ 原來Gee 自己扶住個桶搞掂！ 好叻！！ ^o^
星期日和爺爺媽媽同叔叔去屯門三聖村食海鮮。 Gee發現隔壁擡的小朋友有一個會轉圈的巴斯光年玩具，Gee好想玩。
麻尾： 你不如過去問下小朋友可唔可以借比你玩一陣呀？（以爲講完就算。。。）
Gee： 依家過去問！
麻尾： （真係夠膽過去。。。？！） 咁你自己過去問啦。 但係如果小朋友話唔借就下次先，知道嗎？
Gee： 知道。 麻尾同你去問。 （拉住麻尾的手要走過去）
如果Gee 真係夠膽問，麻尾會好佩服。。。 就算麻尾陪Gee 過隔壁擡，麻尾都有d 唔敢。好似Gee陪麻尾多過麻陪Gee。。。
終于Gee和麻尾都戰戰兢兢地走過去。。。
Gee： 個個係唔係巴斯光年呀？可唔可以借比我玩呀？
Gee： （小朋友沒有理會） 個小朋友食緊麵wor。。。
麻尾： 不如等小朋友食完麵先過來玩啦？
小朋友的家長見到Gee 想和小朋友玩，就拿了一個麥當勞玩具出來借比Gee 玩。 但Gee 搖頭唔要。。。 （因爲唔係他想要的巴斯光年。。。） 然後我們回自己座位。。。
麻尾： 不如一陣等小朋友食完麵我地用你架車仔同佢交換呀？
Gee： 好呀！
一陣過後，小朋友也拉著他媽媽過來，想和Gee 玩。 這次Gee 用他的車仔成功和小朋友交換巴斯光年。 Gee好開心！再過一會兒，Gee已經過左去隔壁擡玩。
其實大人們也暗地佩服Gee的勇氣。 要開口向陌生人提出要求真係需要重大的勇氣，可能年紀細的小朋友沒有太多面子的顧慮，也不怕被拒絕。 麻尾好高興這次能夠陪你走出一步去嘗試，你也教曉我們其實很多事情都應該鼓起勇氣去試， 並尋找不同解決問題的方案， 可能會有意外的收穫。 ^0^
昨晚麻尾見到Gee食手指食得好滋味。。。
麻尾： 可唔可以比你只手指我食呀？
Gee： 唔可以。
麻尾： 可以那~ 好似好好味道咁.
Gee： 你食自己個只啦。
麻尾： 你個只好似好味d~
Gee： 唔係！你食自己個只。
前幾天落大雨，又閃電又行雷。 晚上麻尾陪Gee訓，其實Gee都差不多訓著，但一閃電。。。
Gee： （超級溫柔地） 麻尾~~
麻尾： 咩事。。。 / 嗯。。。
以上的對話起碼重復左二十次Gee先訓著！但麻尾好sweet，好開心~~~
今早行出街口就見到10號車，爸比抱起Gee 急步走去車站，但都是追唔到。
麻味： 我地追唔到一零車呀，點算呀？
Gee： （好正面地。。。） 唔緊要哪~ 等下一架一零車咯。
麻味需要學習的正面人生態度~~
Gee 這幾晚不會自己走過來，系叫麻味過去。。。。
Gee： 麻味~~~~~~ 過來陪我訓！！~
麻味： 等一陣。。。（希望Gee自己訓返）。。。
Gee： 依家過來！！~~
麻味無奈地走過去陪訓~~ -_-"
麻味陪Gee 睡的時候有小小鼻塞。。。
麻味： 我有小小鼻塞呀，要轉過去訓，一陣通返轉返過來~
麻味就轉身，背住Gee。 安靜幾秒后。。。
Gee： 洗唔洗"sun" 呀？
麻味： 唔洗。
Gee： 要唔要撩呀？
麻味： 唔洗。
睡到半夜，突然Gee 叫。。。
Gee： 麻味~ 麻味~ 哇~~~~
比平時叫得更高聲和淒慘，然後喊左出來。。。 爸比馬上過去安撫。 一切安好不久，Gee 哭著走過來， 麻味抱Gee上大床攬住問什麽事。
Gee： 有烏蠅呀~ 哇~~~~
可能早上經過櫥窗見過烏蠅，晚上就發惡夢。 麻味解釋烏蠅好細粒，並不可怕。 第二天早上再問Gee 是否記得昨晚發夢。
Gee： 琴晚發夢見到烏蠅呀，我唔小心倒瀉左d 糖出來，就有烏蠅啦。
^__^ 點解你又知道這是發夢既？？雖然喊曬好可憐，但麻味覺得好可愛呀！！！
那兩晚Gee 突然要求要和爸比訓。。。
麻味： Gee今晚同唔同麻味訓？
Gee： 唔同！
麻味： （扮喊） 點解呀？
Gee： （好認真地說） 因爲你汙糟呀！我唔同你訓，你好汙糟。
麻味： （你點知我今日未沖涼架。。。。。。 -_-"）
晚上Gee 在廳自己玩，麻味在房間。。。
麻味： （學Gee早上的對話） 朗言沖奶奶比麻味飲！要大奶奶，依家沖！
Gee： 唔沖！
麻味： 沖哪~ 朗言沖奶奶比麻味飲！依家沖！
Gee： （鍊起把聲） 鬧鐘響先沖！
Gee 學麻味用同一個語氣和用詞打發我走~~~！！！
晚上回家后，爸比正在哄Gee起身沖涼，Gee 賴在床上食手指。。。
爸比： （伸出兩隻食指） 好似細個咁拉你起身好無？
Gee： （露出笑容） 好~ （雙手抓住爸比食指拉起直坐立姿勢）
爸比： 再拉~
Gee： （再次坐起來）
爸比： 拉埋今次就沖涼好唔好？應承？
Gee： 唔好！
爸比和麻味馬上爆笑，也驚嘆Gee 竟然能看穿爸比的陷阱。
昨天Gee小童床的床褥終于送到。晚上爸比順利讓Gee在新床入睡。半夜。。。
Gee： （在隔壁房輕聲叫。。。） 麻味~~
（爸比第二天話麻味一聽到Gee的叫聲就一支箭咁走過隔離房）
（Gee 沒有喊，只是坐了起來）
麻味： （睡在Gee旁邊） 我陪你訓一陣好無？然後麻味過返去得唔得？
Gee： 得。
（麻味陪一陣之後就回自己房間）
10分鐘后。。。
Gee： 麻味~~ 拖住麻味
麻味： （麻味這次坐在床邊等Gee再次入睡）
10分鐘后。。。聽到有細細的腳步聲。。。噠噠噠。。。
（Gee 好用力拉著麻味剛才陪訓時的大人被子進來。。。）
Gee： 上來訓。
麻味： 好啦！上來訓一陣自己落返張床到訓好無？
Gee： （已經訓左在麻味枕頭） 好！
麻味覺得GeeGee已經好叻！ 第一次自己訓都算順利，只是未習慣環境而已！加油！！
爸比和Gee玩~
爸比： 等我食左你隻腳先~ （扮咬）
Gee： 唔好啦。。。隻腳用來行路架。
爸比： 咁食左隻手啦，隻手唔洗行路。
Gee： 唔好啦。。。隻手要黎舉手架。
爸比： （正在驚嘆這個答案。。。） 咁一係食左隻個patpat呀？
Gee： 唔得架啦。。。個patpat要黎著片架。
臨睡前，Gee 一如以往在床上滾動。。。突然間。。。
Gee： 麻味，我成日都好掛住你架！
麻味： （已經暈曬大浪。。。然後攬住GeeGee） 麻味都好掛住你架！！
這種甜蜜的感覺好似回到拍拖的時候~~~~ ^o^
臨訓Gee 叫麻味講故事。。。爸比都在。
麻味： 麻味講故事好唔好聼？
Gee： 好聽。
麻味： 爸比講故事好唔好聼？
Gee： 唔好聽。
麻味： 麻味識唔識講故事。
Gee： 識。
麻味： 爸比識唔識講故事。
Gee： 唔識。
麻味頓時眉飛識舞，馬上拿個相機打算錄起。。。
（攝錄開啓。。。）
麻味： 麻味講故事好唔好聼？
Gee： 唔好聽。
麻味： 爸比講故事好唔好聼？
Gee： 好聽。
麻味： 麻味識唔識講故事。
Gee： 唔識。
麻味： 爸比識唔識講故事。
Gee： 識。
！！！！！！！！ 點解講的東西完全相反？！？！ 爸比話你故意，因爲看到我想拍低。於是麻味放下相機，再重復問以上四條問題。Gee 竟然話麻味講故事好聽和識講，爸比講故事就唔好聽。。。
然後麻味再次開始攝錄。。。 重復問題。
Gee 的答案竟然和上次拍下的一樣！！所以Gee是故意整蠱麻味的！！！！O_o
星期六下午麻味要趕在7點前把舊書捐出，出門時已經是6點多。 捐書地點在嫲嫲家旁邊， 走路過去要十幾分鐘。 本來想坐巴士， 但麻味沒有帶八達通， 爸比又不夠零錢。。。
爸比： 無得搭巴士啦， 因爲沒有 cling cling cling （零錢）。
Gee： （想也沒有有想） 咁搭的士啦！
爸比&麻味： （驚訝對望。。。 Gee 講得有道路！）
早上麻味準備換衣服，Gee 走過來。。。
Gee： 麻味我想摸下bb呀。
麻味： 好呀。 等我著埋件衫比你同佢講早晨，好唔好？（然後麻味開始換衫。。。）
Gee： （指住麻味。。。） 呢到要來沖奶奶架~
麻味： 呢到用來pump奶奶架， 遲d pump 比bb同你飲。 可以摸下bb啦。
Gee： （用手指輕輕掂下麻味肚腩） 要細細力摸架~ 唔好咁大力呀， bb 會喊架！
麻味： 乖啦~ 你同bb 講早晨啦~
Gee： （一邊走出房間一邊自言自語） 遲d 你同bb 玩好無？同你一齊玩積木。
GeeGee 將會是個好哥哥！！^-^
睡覺時。。。
Gee： 拖住麻味。
麻味： （伸手拖住Gee）
Gee： （一邊吃手指，一邊情深款款咁望住麻味。。。再好溫柔咁叫。。。） 麻味~
麻味： GeeGee
Gee： （繼續。。。） 麻味~ （然後微笑 ^-^）
每晚可以拖住GeeGee 訓覺真係好開心好冧!
今天晚上團年飯會向家人公佈有BB，並訓練Gee 做公佈。
麻味： 麻味個肚裏面有咩呀？
Gee： BB 呀！
爸比： 係男仔還是女仔？
Gee： 男仔。
麻味： （大笑~~~） 你想要細佬定係細妹呀？
Gee： 細佬。
爸比： 不如要細妹呀？
Gee： 唔好。。。
爸比： 要哪~~
麻味： （不知道Gee 的直覺準確嗎~~？）
公公大廈門口有一個桔被人踩扁左。 回到家后。。。
Gee： 麻味，公公門口個"柑"做乜野呀？
麻味： 個"柑"被人踩扁左。
Gee： 係桔""唔係"柑"！
麻味： 呀~ 你整蠱麻味~~~~
Gee： （偷笑。。。） 整蠱麻味~~~~
昨晚Gee 和麻味在大床睡着后，Gee 就被放囘自己的細床。。。 然後麻味和爸比在廳正準備欣賞電視， 聽到房間有聲音。麻味入房后在細床看不到GeeGee。。。 心裏想，明明已經把剛才已經把GeeGee 放返去細床，唔通我記錯？ 把門再開大d，看到Gee 帶埋自己張被訓返在大床爸比個位。。。
麻味： 點解你上左來既？
Gee： 佢去搵麻味咯~
麻味： （又成個冧曬~~ 連忙錫錫Gee~~ ^0^）
趁Gee訓返，麻味又靜靜雞溜出去繼續看電視。。。 點知過左一陣房間又傳來聲音。
麻味： 做乜野呀？
Gee： 麻味呢？麻味去左邊度呀？
麻味： 麻味係到！麻味拖住Gee 訓好無？
麻味比左一只手指Gee 拖住。。。 本以爲Gee 已經訓著，想離開，Gee 馬上拖緊手指。。。 -_-" 幾經辛苦先再溜到出去，但個心好甜~~~~
麻味之前和 Gee 提過麻味個肚裏面有個BB，Gee 沒有大反應。 前幾天晚上臨睡前。。。
Gee： （自言自語） 麻味遲D生個BB出來你同佢換片呀！
麻味： 重有呢？
Gee： 同佢玩。。。同餵佢飲奶奶。
********************************************************************************
搭 lift 中。。。
Gee： （突然指住麻味個肚。。。）麻味裏面有個BB架！摸下BB先~ （細細力摸左麻味個肚一下）
爸比： （指住自己個肚） 爸比裏面有無BB架？
Gee： 無架！得麻味先有架ja！
自己講估仔
臨訓前。。。
Gee： 麻味，我好想去老鼠屋企玩呀！（近來看的書本裏有小老鼠學刷牙）
麻味： 老鼠屋企有咩玩架？
Gee： 有好多車車玩架！
麻味： 咁你問下老鼠比唔比你玩啦~
Gee： （自言自語。。。） 我去到老鼠屋企，然後噤制， 叮噹~ 叮噹~
Gee： 跟住老鼠就開門。。。 （自己扮老鼠） "邊個搵呀？。。。 邊個搵我呀？"
Gee： （做返自己。。。） 吳朗言！
*******************************************************************************
同麻味訓
準備睡覺。。。
Gee： （指住大床） 係依到訓！
爸比： 如果係依到訓就要同麻味訓，同爸比訓就要落返去訓。（爸比滿有信心Gee會選擇和爸比訓）
Gee： 係依到同麻味訓。
爸比： （再度確認） 咁同麻味訓啦 wor？
Gee： 係！麻味好d。
麻味： （感覺好威水~~~~~~~）
沖涼前麻味幫 Gee 除曬衫褲后要求 Gee 自己除片。。
麻味： 你自己除褲啦。
Gee： 唔係除褲，係除片。
。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。
在看書。。。
麻味： 地盤d叔叔係唔係都有帶頭盔架？
Gee： 唔係頭盔，係安全帽！
。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。
早上起床。。。
Gee： 麻味我想食一粒朱古力呀。
麻味： 點解要吃朱古力？
Gee： 因爲我好乖呀！
。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。。
爸比給水果（藍莓，黑提子，香蕉）Gee 食。。。
爸比： （指住粒提子） 你自己篤粒藍莓食。
Gee： 唔係藍莓， 係提子！
GeeGee 在電梯内發脾氣。。。
爸比： 返去請你吃一粒星星病好無？
GeeGee： 五粒。
爸比： 兩粒？
GeeGee： 唔好，五粒。
爸比： 四粒？
GeeGee： 唔好，五粒。
爸比： 六粒？
GeeGee： 好！
-_-""
星期六下午。。。
睡醒后突然話屙屎屎，麻味馬上拿個屎屎盆出來放在大廁所上。GeeGee 玩厠紙，沒有屎屎~ 爸比然後話，如果下次成功在大廁所屙屎屎就有朱古力吃。
午飯后，GeeGee 坐在椅子上臉色有變，爸比麻味馬上轉移GeeGee 到大廁所，好彩屎屎盆沒有收起。這次GeeGee 認真的用力了，然後聽到爸比的歡呼聲！！ GeeGee 成功在大廁所第一次去大便！！ 哈哈！完事后給GeeGee 一番鼓勵並獎勵M&M朱古力！！
******************************************************************************
星期日晚上。。。 GeeGee 和爸比在房間準備睡覺，麻味在沖涼。。。
突然爸比大叫"麻味GeeGee 話屙屎屎，可以入來嗎？"
麻味： （剛剛開始沖涼。。。） 可以。。。"
搞笑的情況出現，GeeGee 在大廁所努力中，爸比在旁鼓勵，麻味就繼續一邊偷笑一邊沖涼。
GeeGee 還不時在蒸汽中 buu jaa 麻味, 場面實在非常滑稽！
GeeGee 最終成功連續兩天自己提出去大測試便便，原來這小小的進步對於父母來説卻是萬分自豪。 :)
